Факултетот за природни и технички науки од Штип и Институтот за комуникациски студии од Скопје в четврток во Штип ќе ги презентираат резултатите од мерењата на квалитетот на воздухот, водата и почвата во скопскиот и штипскиот регион. Презентацијата ќе се одржи во стариот ректорат на Универзитетот со почеток во 11 часот.
Во текот на изминатиот месец, универзитетската лабораторија за животна и работна средина АМБИКОН изврши директни мерења на концентрациите на суспендираните честички во градинки, училници и спортски сали во училишта, на изложеноста на велосипедистите на аерозагадувањето од сообраќајот и на квалитетот на водите и на почвите во урбани, земјоделски и индустриски зони. На престојниот настан ќе бидат презентирани резултатите за:
- Квалитетот на воздухот во микро-средините во кои престојуваме
- Квалитетот на водата и почвата во урбани и рурални средини
Презентацијата се организира како дел од кампањата за подобра животна средина „Не игнорирај! Реагирај!“, која ја реализира Институтот за комуникациски студии, а е финансирана од Британската амбасада во Скопје.