Во Стопанската комора на Македонија денеска ќе биде презентиран Јавниот оглас за доделување премии за изградба на фотоволтаични електрани на државно земјиште.
Презенатцијата ја организира Македонската енергетска асоцијација, а целта е навремено информирање на заинтересираните за условите и критериумите за добивање премии за градба на фотоволтаични електрани на државно земјиште.
Како што е најавено, на презентацијата ќе се обрати вицепремиерот Кочо Анѓушев. Тој во четвртокот соопшти дека денеска ќе биде објавен и првиот јавен повик за изградба на фотонапонски електрани на државно земјиште, со инсталирана моќност од 35 мега вати. За изградба, рече, се предвидени две локации, Свети Николе – за вкупно 25 мега вати и Македонски Брод – за 10 мегавати. Државата ќе ја обезбеди целата инфраструктура и ќе ги заокружи сите потребни административни постапки. На компаниите останува да изготват само основен проект и еколошки елаборат.
Единствен критериум за избор на компаниите ќе биде премиумот што тие ќе го бараат. Постапката ќе биде јавна и максимално транспарентна, преку електронска аукција, со поддавање – намалување на премијата. Според вицепремиерот, со ЕВН е постигната добра цена за приклучоците, околу 20.000 до 30.000 евра по инсталиран мегават. Интересот кај вложувачите, и домашни и странски, е голем, а ограничување за набавката на опремата нема. За струјата, дополни Анѓушев, ќе биде номиниран и откупувач, зашто не сите компании се дел од трговијата со електрична енергија.
Државата предвидува да определи површини за изградба на фотонапонски електрани со инсталирана снага до 200 мега вати.
МИА