Заврши рокот за поднесување барања за добивање месечен паричен надомест за стечајните работници. Во Центарот за вработување за добивање месечен надомест се имаат пријавено 680 лица.
– Со оглед на тоа дека рокот за поднесување барања за материјално обезбедување истече заклучно со денешниот ден, 28 февруари 2019 година, можам да кажам дека од досега поднесените и разгледани барања за материјално обезбедување, над 680 лица го остварија правото за материјално обезбедување, рече Катица Арсовска, раководител на Центарот за вработување – Штип.
Претседателот на Здружението на стечајни работници „Унит“ во Штип Ќемалдин Арсланов вели дека со оваа бројка се исцрпуваат лицата кои претендираат на месечен паричен надомест.
– Ова е убава вест за нашата заложба, нашите членови по повеќегодишна битка со државата да се избори за правото на стечаен надомест, како еден вид компензација, а во истовреме и вреднување на нивниот остварен труд во фирмите каде не по нивна вина е ставен клуч на врата, вели Арсланов.