Не е само еден ден во годината кога треба да се мисли на лицата со посебни потреби. Треба секој ден да се мисли на нив, особено за оние кои се со најтешка форма на инвалидитет, децата со церебрална парализа. Родителите на овие деца велат дека се на маргините на општеството и се соочуваат со секакви проблеми, а најголеми се финансиските.
-Родителот кој е 24 часа со детето, нема работен стаж, детето мора да се гледа бидејќи се работи за најтешка категорија, деца со церебрална парализа, еден родител треба да биде цело време со детето. Никакви бенефиции од државата не добиваме освен додатокот кој беше 4300 денари, сега го покачија на 5000. Но сепак мислам дека не се доволнин за одгледување дете од таа категорија бидејќи родителот не работи, вели Бети Булаковска, претседател на Здружението на деца со церебрална парализа Емануел Плус од Битола.
Овие деца се со најтешка форма на инвалидитет, односно со физичка, со психичка, интелектуална попреченост, деца врзани за кревет, но и деца за кои најмалку се зборува, вели Билјана Стојановска, член на Здружението.
– Дечиња на кои што му е потребна само лична хигена, еден физиотерапевт, и многу љубов. Но за сето тоа да се обезбеди, посебно на оваа категорија, потребни се финансиски средства. Државата ветува, но бавно ги реализира нашите потреби, вели Стојановска.
По повод Меѓународниот ден на лицата со посебни потреби беше организирано традиционалното дефиле по Широк Сокак чија цел е да се подигне свеста кај сите останати за социјализација и интеграција во општетството, вели Андријана Шокларовска, дефектолог и член на Лајонс клуб Кабадаја Битола.
-Се надеваме дека ќе има позитивен фидбек од секоја институција и секоја индивидуа поединечно, секој ден треба да биде 3 Декември, а не само денес, реше Шокларовска.
Маја Богоевска