Официјалните информации говорат дека четирите авиони воопшто не се пуштени во употреба од страна на Украинската војска. Тврдењето дека два од нив се веќе срушени е без никаков доказ или потврда. Иако на почетокот на овој пост е напишана фразата „објавено е“, сепак никаде нема информација каде е тоа објавено или кој го објавил тоа. Нема никаков податок како е дојдено до оваа информација, ниту е понудена некаква потврда за искажаното тврдење
Фејсбук објава неточно тврди дека два од четирите воени авиони коишто Македонија ѝ ги донираше на Украина биле соборени од руската противвоздушна одбрана. Ова е измислена информација која нема никаква врска со реалноста.
Објавено е дека од четирите авиони Су-25 кои северџанската окупаторска власт и ги даде на Украина — без одобрување од страна на македонскиот народ — денес руската против-воздушна одбрана собори два.
Едниот е соборен во Херсонската област, а другиот во Кировската област, пишува во постот.
Не е точно дека каде било е објавено дека два од четирите воени авиони биле соборени. Ваква информација официјално не може да се најде ниту во изјавите од руска, ниту од украинска страна. Напротив, украинските власти изјавија дека донацијата од Македонија сè уште не е ставена во употреба и дека за тој процес е потребно да помине подолго време.
Всушност, една од областите каде што наводно бил срушен еден од авионите – Кировска област нема никаква врска со Украина. Ваква област со вакво име воопшто и не постои во Украина. Кировска област е федерален субјект на Русија во Источна Европа. Нејзин административен центар е градот Киров и се наоѓа две илјади километри оддалеченост од Киев, главниот град на Украина.
Деновиве украинскиот медиум Лига пренесе дека:
Јуриј Игнат, портпаролот на воздухопловните сили на украинската војска, коментирајќи го трансферот на авиони Су-25 од Северна Македонија во Украина, нагласи дека овој процес продолжува, но не е лесен и потребно е долго време за оваа опрема да биде функционална.
Во одговор на новинарско прашање дали Украина веќе ги примила македонските напаѓачки авиони, Игнат потсетил дека примарниот извор на оваа информација се медиумите во Северна Македонија и нагласил дека такви работи „се многу опасни да се кажат, бидејќи диктатор и терористичка држава веднаш реагираат многу чувствително“.
Игнат, исто така, истакнал дека процесот на пренос на таква опрема, како што се тешки противвоздушни ракетни системи и авиони – во овој случај Су-25 – не е лесен, бидејќи е неопходно некако да се транспортираат и да се стават во употреба.
Засега тоа е во процес. Од првата објава за донацијата, до нивното пуштање во употреба ќе помине долго време. Да се надеваме дека наскоро ќе ги имаме во служба, вели портпаролот на украинските воздухопловни сили во изјавта што ја пренесе украинскиот медиум Лига.
Дел од македонските медиуми објавија дека по донацијата на тенкови за Украина, четирите воени авиони „СУ-25“ што Северна Македонија ги набави од Украина за време на конфликтот во 2001 година, деновиве му се донирани на Киев. Станува збор за авиони што се призејмени од 2004 година и коишто С. Македонија во меѓувреме планираше да ги продаде.
Ваквата информација сè уште не е потврдена официјално од Министерството за одбрана, од каде деновиве информираа дека се донесени три одлуки, чија содржина сè уште е тајна.
Точните детали за сите три одлуки, нивната содржина и објаснување ќе бидат декласифицирани и транспарентно објавени. Со досега донесените одлуки не се нарушува борбената готовност на нашата армија, наведуваат од Министерството за одбрана.
Официјалните информации говорат дека четирите авиони воопшто не се пуштени во употреба од страна на Украинската војска. Тврдењето дека два од нив се веќе срушени е без никаков доказ или потврда. Иако на почетокот на постот напишана е фразата „објавено е“, сепак никаде нема информација каде е тоа објавено или кој го објавил тоа. Нема никаков податок како е дојдено до оваа информација ниту е понудена некаква потврда за искажаното тврдење.
Овој напис е изработен во рамките проектот Промовирање на пристап до веродостојни вести за борба против дезинформации, имплементиран од Фондацијата Метаморфозис. Написот, кој е првично објавен во Вистиномер, e овозможен со поддршка на американската непрофитна фондација NED (National Endowment for Democracy). Содржината на написот е одговорност на авторот и не секогаш ги одразува ставовите на Метаморфозис, НЕД или нивните партнери.