Грчкиот остров Алонисос го одбра Денот на вљубените за официјално да ја објави и соопшти можноста за организирање подводни венчавки, а за крајот на август веќе е закажана и првата ваква венчавка, јави дописничката на МИА од Атина.
За промоција на поинаквата можност за стапување во брак, од општината објавија и видео под слоганот „Alonissos, I Love You Deeply!”, а меѓу нуркачите, како што пишува грчката новинска агенција АНА-МПА, е и градоначалникот на островот Петрос Вафинис, кој веќе церемониите може да ги извршува и под вода.
Вафинис вели дека заедно со првиот подводен музеј во Грција, отворен токму на Алонисос и другите прекрасни места за нуркање, во последните години го истакнуваат нуркањето како начин на живот.
-Подводната венчавка на нашиот остров е одличен начин за размена на завети во текот на целата година и за парот не се потребни посебни вештини и знаење, ниту неразумни трошоци. На Денот на вљубените ги покануваме сите заљубени да го живеат подводното свадбено искуство на Алонисос и од тука да го започнат новиот живот, порача градоначалникот на островот, пренесе АНА-МПА.
Алонисос, заедно со Скиатос, Скопелос и Скирос се дел од Спорадските острови во Грција.
МИА
Фото: OT.gr Newsroom