Од јануари годинава во земјава се регистрирани вкупно 68 микро винарии. Согласно новата Пргограма за поддршка, тие ќе можат да бараат грантови од 10.000 евра за опрема и за консултантски, енолошки услуги. Според министерот за земојделство, шумарство и водостопанство, Љупчо Николовски, Програмата се креира прв пат и моментно „тежи“ пет милиони денари. Но, интенцијата е да се обезбедат средства и да се поддржат сите апликанти кои ќе достават комплетни барања.
Во интервју за МИА, тој најави и нов закон за вино, по европски терк, како и уште две нови програми – за поддршка и грантови на сите семејни производители на производи од животинско и неживотинско потекло.
-Станува збор за сосема нов, европски закон кој ќе биде готов наредниот месец. Инаку, веќе имаме 68 винарии регистрирани од 1 јануари 2020 година – концепт што беше многу оспоруван, а „големите“ сакаа да не се случи и го кочеа во изминатиот период. Но, ете, се случи. Всушност, од 1 јануари 2020 година имаме регистрирано поголем број производители на вино отколку во сите 30 години претходно“, нагласи Николовски.
Тој смета дека е потребна поддршка, не само за регистрираните мали винарии, туку и за другите семејни производители, како семејни производители на производи од животинско и неживотинско потекло, на оние на кои им е овозможено да продаваат од куќен праг.