Најдобриот пријател на човекот не само што може да ги избрка крадците или да им го покаже патот на лицата со оштетен вид, туку може да предвиди и епилептичен напад, покажа студија на Универзитетот во Белфаст.
Епилептичните напади се поврзани со специфични мириси кои се препознатливи за кучињата, напишаа авторите на студијата во списанието MDP и Animals.
Постојат бројни анегдоти за кучиња кои покажуваат промени во однесувањето пред нападот, но ниту една научна студија досега не ги потврдила тие тврдења, велат тие.
Тим научници, предводен од биолог од Универзитетот во Белфаст, Нил Пауел, изложи деветнаесет кучиња без искуство со епилепсија на мирисите карактеристични за трите фази на нападот. Станува збор за мириси што се појавуваат во потта на пациентот пред нападот.
Сите 19 кучиња, а беа од различна возраст, раса и пол, покажаа промени во однесувањето кога почувствуваа мирис поврзан со напади.
„Некои дури трчаа напред и назад кон другите членови на семејството за да ги предупредат дека на некого му се заканува напад без претходен тренинг“, рече Пауел, додавајќи дека самата обука не е тешка и може да се спроведе за шест до осум недели.
Во зависност од расата, кучињата имаат 10.000 до 100.000 пати помоќно чувство за мирис од луѓето.
Наодите на тимот на Пауел би можеле да помогнат во развојот на „потенцијално спасувачки систем за рано предупредување“ за 65 милиони луѓе во светот кои живеат со епилепсија, од кои 30 проценти не успеале да ги контролираат нападите со лекови.
“Луѓето кои имаат тешки напади и живеат во страв дека едноставно ќе отидат во тоалет или ќе одат без придружба на прошетка, треба да стекнат право на обучено куче што може да почувствува напад и да ги спаси од повреда или дури и ненадејна смрт”, рече тој. Пауел
Нивното истражување продолжува.
„Тоа на крајот може да резултира со развој на електронски уред кој би бил чувствителен на подемот на специфични биомаркери што претходат на нападите“, рече тој.
Питер Марфи, претседател на Епилепсија Ирска, верува дека наоѓањето сигурен метод за предвидување на напади е „светиот грал за многу пациенти со епилепсија“.