Меѓународната награда за мир на Вестфалија им оддава почит на личности или претставници на држави и групи кои се особено посветени на европската интеграција и мирот во Европа.
Во своето обраќање на церемонијата во чест на добитниците на наградата, премиерот Заев се заблагодари и нагласи дека огромна чест и привилегија е што неговото, и името на неговиот пријател Алексис Ципрас, ќе бидат додадени на долгата листа на добитници на оваа награда, заедно со познати имиња како што се Вацлав Хавел, Хелмут Кол, Валери Жискар Дестен, Кофи Анан, Хелмут Шмит, екипажите на Меѓународната вселенска станица, трите балтички држави Естонија, Латвија и Литванија и други.
Како што информираат од Владата, премиерот Заев рече дека како што Вестфалскиот договор не зборува само за мир, туку и за пријателство, така и во суштината на Договорот од Преспа лежи пријателството меѓу Република Северна Македонија и Грција содржано во Преспанскиот договор од 17 јуни 2018 година.
Со овој договор, рече премиерот Заев, се стави крај на спорот и долготрајната разлика што крена ѕидови, што ги отежна соседските односи меѓу Северна Македонија и Грција и ги блокираше перспективите од клучен стратешки интерес за нашата земја, за регионот и за евроатлантските структури.
-Иднината беше идеја водилка во текот на целиот процес. Двете страни го прифатија компромисот како пријателство и грижа за интересите на вашиот политички партнер од другата страна, како и за вашите сопствени интереси. Тоа пријателство беше важно за да се создаде атмосфера во која отворено разговаравме за сите прашања, дури и кога се чинеше дека нема решение, нагласи Заев на церемонијата што ја пренесуваше германската државна телевизија на Северна Рајна – Вестфалија.
Претседателот на Владата Заев дополни дека заедно со тогашниот негов колега Ципрас избрале да најдат решение без одложување.
=И јас и Алексис сме целосно свесни дека ја ставивме нашата политичка кариера во ризик. Оваа цврста определба, подготвеноста да ги жртвуваме сопствените политички кариери во име на иднината не поврза и не водеше низ процесот. Избравме да оставиме решенија како траги зад нас. Решенија за нашите граѓани и за нашите општества и дојдовме до решение кога сите тврдеа дека е невозможно, потенцираше Заев.
Премиерот Заев пред високите гости на церемонијата истакна дека оваа година Северна Македонија слави 30 години од својата независност и дека оваа значајна годишнина се совпаѓа со членството во НАТО како триесеттата земја членка.
-Тоа беше можно поради Договорот од Преспа. Почестен сум и што имав можност да го исполнам сонот на многу генерации граѓани на Северна Македонија. Членството во НАТО беше остварување на нашата стратешка цел и е меѓу нашите најголеми достигнувања во надворешната политика. Членството во НАТО е одраз на нашиот суверен избор и сведоштво за нашата силна политичка и општествена цел да бидеме целосно интегрирани во евроатлантското семејство на нации, рече Заев на свеченоста по повод доделувањето на Меѓународната награда за мир на Вестфалија.
Заев додаде дека денес Северна Македонија е фактор на стабилноста и безбедноста и на регионот, и нагласи дека земјата е посветена на визијата за Балканот во 21 век, како регион на мир, стабилност и зголемена регионална соработка за економска корист и просперитет на сите граѓани.
Заблагодарувајќи се уште еднаш за одлуката да му биде доделена Меѓународната награда за мир на Вестфалија, премиерот Заев истакна дека наградата е признание, но и обврска за сите наши идни политички одлуки да бидат посветени на европските вредности и мир што немаат алтернатива.
На свечената церемонија за врачување на Меѓународната награда за мир на Вестфалија во Мунстер, претседателот на Економското друштво на Вестфалија Липе д-р Рајнхард Цинкман, градоначалникот на Мунстер Маркус Леве и претседателот на Латвија Егилс Левиц во име на претходните добитници на наградата, земјите Латвија, Естонија и Литванија, истакнаа дека Зоран Заев и Алексис Ципрас постигнаа нешто што никој претходно не успеа и со историскиот Договор од Преспа надминаа долгогодишна криза и поставија основи за долгорочни пријателски врски меѓу двете земји и сигурност во регионот.