Преку писмено соопштение, Сојузот на синдикатите на Македонија реагираше дека не е поканет на денешната седница на Комисијата за труд и социјална политика во Собранието, за законското решение со кое недела ќе стане неработен ден.
Сојузот на синдикатите на Македонија не е поканет на седницата за да може во името на работниците да ги пренесе нивните ставови во врска со предложениот законски текст за прогласувањето недела како неработен ден односно ден за неделен одмор како право кое конечно ќе се воведе, а е по барање на ССМ уште од 2017 година, забележуваат оттаму во денешното соопштение.
ССМ им укажува на пратениците дека зголемувањето на додатокот на плата за работа во недела, според синдикалците,, треба да изнесува најмалку 100 проценти за секој час поминат на работа во недела.
ССМ уште еднаш укажува дека останува на ставот дека заради спречување на злоупотреби потребно е денот на неделен одмор за исклучоците од став 3 од Предлог Законот за работните односи, да биде денот што му претходи, односно му следи на денот недела односно или саботата пред недела или понеделникот.
Напоменуваме дека дури и пренесувањето на правото за само еден ден во наредната недела може да значи губење на правото на неделен одмор кој треба да се искористи во 7 дена од неделата – велат од Сојузот.
Сметаат дека помошните дејности и придружните работи од ставот (3) алинеи 40 и 41 на членот 2 од Предлог законот треба да прецизирааат точно за кои работни места ќе станува збор.
-Ние сметаме дека треба да се однесува единствено на обезбедување и заштита на објектите и одржување на ИТ уредите за непречено извршување на основната дејност на работодавачот и евентуално дополнување за уште едно до две работни места кои ненамерно се пропуштени – додаваат од ССМ.
Од Сојузот предлагаат при прекршување на одредбите од член 134, за оние работодавачи кои ќе се осудат да работат во недела, а нема да бидат во исклучоците, забрана за вршење на работа да се донесува на целокупното работење, а не во работниот простор или работа просторија каде е утврдена неправилноста односно работата во недела.
Нагласуваме дека казните треба да бидат сериозни за да се делува превентивно и се спречи прекршување на законот. (Досега во пракса се покажа дека вака уреденото законско решение во делот на непријавени работници член 259 од ЗРО е проблематично од причини поради тоа што работодавачот продолжува да работи во други простории со оглед на тоа што забраната се однесува само за определени работни простории, а не за целокупното работење) – додаваат во соопштението.