Крај на сезоната за Голден Стејт Вориорс, крај на надежите на потенцијалниот МВП за директен дуел со Јута Џез во плеј-офот на Западот.
„Воините“ од вториот обид не успеаа во плеј-инот да обезбедат победа над Мемфис Гризлис и сезоната над очекувањата за нив да ја направат уште подобра.
Исто како и на дуелот со Лос Анџелес Лејкерс, момците на Стив Кер покажаа огромна борба и до самиот финиш ја чуваа шансата за враќање онаму каде што всушност припаѓаат.
Триесет и деветте поени на Стеф Кари не беа доволни за избегнување пораз од 112:117 oд талентираниот и полетен тим на Мемфис. По регуларниот дел и резултат 99:99, Џа Морант и екипата сепак манифестираа карактер и издржливост во моментите кога двобојот „се кршеше“.
https://www.youtube.com/watch?v=pmSfJ7OgOdI
Морант на свое конто на крајот забележа 35 поени, Дилон Брукс уфрли 14 поени, Грејсон Ален 12 поени, а Ксавиер Тилман 11 поени. Кај поразените, покрај неверојатниот Кари, Ендрју Вигинс оствари учинок од 22 поени.
Во првиот дуел од плеј-офот, сега Мемфис Гризлис ќе се соочи со првопласираниот од регуларниот дел од кампањата во Западната конференција, Јута Џез. Останатите дуели на Западот се: Лос Анџелес Клиперс – Далас Маверикс, Денвер Нагетс – Портланд Блејзерс, Феникс Санс – Лос Анџелес Лејкерс.
На Истокот, Филаделфија ќе се судри со Вашингтон Визардс, Њу Јорк Никс по подолго време се најде во плеј-офот и шансата за прогрес ќе ја бара преку Атланта Хоукс, Милвоки Бакс и Мајами е сигурно дуелот број еден на источниот брег, а Бостон Селтикс ќе одат на мегдан кај фаворитот Бруклин Нетс.