Три милиони евра, односно 184.5 милиони денари од државен буџет ќе се насочат кон спортските субјекти на кои е издаден спортски ваучер, согласно законот за спорт. Ваквата мерка на Владата и Агенцијата за млади и спорт е резултат на континуираното вложување за подобри спортски услови и непречено спроведување на активностите на спортистите во време на тешки услови во пандемијата на коронавирусот, изјави директорот на АМС, Наумче Мојсовски на денешната прес конференција.
-За 2021 година се предвидени 184.5 милиони денари, односно три милиони евра од државен буџет за спортските субјекти кои имаат спортски ваучер согласно законот за спорт. Досега, 660 спортски субјекти, 60 федерации и 173 спортисти добиле таков ваучер. Средствата на буџетот на Република Северна Македонија се дел од програмите за справување со Ковид-19 и неговите последици. На оние спортски субјекти на кои им е издаден ваучер ќе бидат уплатени најмногу 33 отсто од вредноста на издадениот ваучер како еднократна финансиска помош, утврдена на официјалната листа на спортски субјекти на страната на АМС, најави Мојсовски.
Во однос на постапката, Управата за јавни приходи ќе достави листа од АМС за спортски субјекти корисници на спортски ваучер кои имаат одобрено барање за даночно ослободување и донирање на финансиски средства на спортските субјекти, а веднаш потоа следува евалуација на листата на спортски субјекти и износ на користење на остатокот од ваучерот издаден за 2021 година.
-Откако овие два чекори и едноставна постапка ќе се спроведат, конечната листа ќе биде доставена до генералниот секретар на Владата и ќе следува исплата, рече Мојсовски.
Тој уште еднаш напомена дека Владата и АМС силно се посветени на изнаоѓање решенија за поддршка на спортот и сите спортски работници, со цел тие да функционираат непречено.
(Д.Ј.)
Фото:
Screenshot / Youtube / Влада на РСМ