Во штипскиот ковид-центар од денеска има само два слободни болнички кревети. Директорот на Клиничка болница-Штип Ален Ѓеорѓијев вели дека исполнети се 66 кревети, а од денеска повторно во функција е ставено и Кожното одделение, во кое ќе се префрлаат пациентите, кои се пред да заминат од болница и се со полесна здравствена состојба.
-Пред три дена имавме преполовен болнички капацитет, но еве за овие два до три дена повторно се наполни ковид-центарот со пациенти со тешка клиничка слика од источниот регион, а секако имаме и пациенти од Штип. Во функција од денеска го ставивме Кожното одделение, а на Интензивна нега, односно на Анестезиологија постојано ни се полни четирите болнички кревети, изјави Ѓеорѓијев.
Тој апелира граѓаните да ги почитуваат мерките. -Побаравме и кочанската болница да ги третира пациентите и да ги хоспитализира во нивните капацитети. Таму веќе е и отврена модуларната болница, вели Ѓеорѓијев.
Пациентите се на различна возраст, имаат млади, но доминираат оние од повозрасната популација, а 37 пациенти им се на постојана кислородна поддршка. Ѓеорѓијев очекува за една недела да се отвори новата модуларна болница.
-Таму ќе имаме 47 болнички кревети, централниот довод е поставен, но изминатите три дена временските услови не дозволија да имаме градежни активности надвор и да се постави станицата за централен довод. Пожелно е и очекувам да ја пуштиме за една недела модуларната болница, рече Ѓеорѓијев.
Во штипскиот ковид-центар ангажирани се над 50 лекари, медицински сестри, техничари, болничари и хигиеничари. Што се однесува за останатите одделенија, во моментов имаат шест лекари, сестри и болничари кои се заразени или се во изолација. На Одделението за физикална терапија за состојбата на пациентите се грижат медицинските сестри, еден општ лекар, а доаѓа и специјалист од Скопје.
МИА