Опозициската ВМРО-ДПМНЕ е загрижена што Македонија веќе две ипол години нема највисок воен претставник во НАТО. На прес-конференција за овој проблем, денеска, Драган Ковачки од ИК на партијата, побара одговорност од претседателот Пендаровски и министерката Шекеринска и ги повика да кажат дали се испочитувани процедурите за избор и упатување на лица во мисии во странство.
– Кандидатот што Шекеринска го предложи и Пендаровски го прифати, НАТО го одби. Деновиве, поради безбедносни причини, НАТО ни вратил уште едно лице кое било испратено и работело веќе година дена во Брисел.Шекеринска и Пендаровски испраќаат лица за претставници во НАТО, кои не ги поминуваат нивните филтри. Ова е меѓународен и дипломатски скандал и со него се нанесува штета на угледот на државата, вели Ковачки.
Тој посочи дека процесот на проверка на кандидатите пред нивното упатување е нормален и потребен, но дека е неодговорно да се објави името на кандидатот во јавност пред да ги помине сите проверки.
– Исто така, неодговорно e да го носите тоа лице на средби со министер за одбрана на САД или со генералниот секретар на НАТО. Така правите штета и на лицето и на институциите каде сте го носеле, а пред се и за нас најважно – правите штета на Македонија.Втора работа, далеку понесериозно и неодговорно, е да испратите лице без соодветни проверки на работни задачи во Брисел и после година дена истото да Ви биде вратено поради безбедносни пречки.Трета работа, најзагрижувачка и крајно неодговорна, е што токму кандидатот за највисок воен претставник, внимавајте – бил и претседател на комисијата за избор на лица за упатување во мисии во странство (вклучително и за мисијата на Македонија во НАТО, односно одлучувал за испраќање и на второто лице кое НАТО го врати), рече Ковачки и праша дали оваа ситуација е само случајна и аматеризам, или пак намерна.
Од СДСМ пак одговорија дека ВМРО-ДПМНЕ само се обидува да го руши угледот на Армијата, а Ковачки според нив, е последен кој може да зборува за довербата на НАТО во државата.
– Членството во НАТО, како и меѓусебната доверба меѓу нас и НАТО, беа недостижни во времето кога Ковачки и неговата партија беа на власт. Тие се сработија токму кога тие заминаа во опозиција, и тоа од владата која толку сакаат да ја плукаат.Срамно е овие теми да ги злоупотребува поранешен шеф на воено разузнавање за ситни партиски поени. Срамно е да се биде во редовите на Армијата, а да се работи против неа и против својата земја. Ја држевте земјата 11 години во изолација, ги држевте војниците на плата пониска од просечната, во бедни услови, заборавивте на НАТО, велат од СДСМ.