Ценета, почитувана, прекрасна, со вакви зборови колегите од охридската Општа болница ја опишуваат колешката Дијана Димоска која пред неколку дена ја загуби битката со Ковид-19. Сите се уште се во шок од она што се случи и не веруваат дека неа повеќе ја нема.
-Навистина беше прекрасна личност. Позитивна и мила и постојано насмеана. Секогаш весела и распеана. Помогна на сите а не можеше себе си да си помогне. Не можеа ниту медицинските лица, болеста беше посилна. Првите тестови и беа негативни, два месеци се бореше со болеста и почина во Скопје во болница. Штетата е голема и навистина сега веќе не е важно да се зборува за тоа дали Дијана имала и други коморбидитети или само Ковид-19 ја оддели од нас. Беше толку отоворена за разговор, толку позитивна што мислам дека уште долго време ќе ни недостасува и како човек и како колега. Не само на Одделението за интерни болести, каде работеше, туку и во цела болница. Омилена беше и кај вработените и кај пациентите. Има два сина, велат со тага и неверување вработените во болницата.
Колку Дијана им значела и колку е голема тагата по неа покажа и вчерашниот гест кога низ Охрид со сирени кругови вртеа пет возила на брза помош и во чест на колешката и за подигање на свеста за заштита од вирусот.
