За да спречи ширење на коронавирусот, Норвешка во март ги затвори границите со Шведска. Тоа натера двајца близнаци, кои секоја година си го славеа роденденот заедно, сега да почнат нова традиција – 72. роденден да го прослават на гранична линија.
Понтус и Ула Берглунд се еднојајчени близнаци што израснале во шведскиот град Гетеборг. Денес Понтус и понатаму живее во Шведска, во Стремстад, а Ула е преселен во норвешкиот град Халден. Стремстад и Халден ги спојува мост преку мореузот Свинесунд, кој е висок 65 метри. На него, на самата гранична линија помеѓу двете земји, го прославија роденденот, со торта, но без физички контакт. Се договорија и додека границата е затворена, секоја сабота на истото место, на средината на мостот, да се видуваат во 11 часот, објавува шведскиот јавен сервис СВТ, а пренесува РТС.