Топол бран и повисоки температури на воздухот во земјава го карактеризираа почетокот на овој месец, достигнувајќи до 37 степени.
– Според досега измерените вредности на првата декада од септември, 2019 година се категоризира како многу топла декада, освен мерното место Скопје, кое се карактеризира како топло, информираат од УХМР.
Според мерењата, максималната температура во Гевгелија изнесувала 37,1 степени, Демир Капија 35,5 степени, Струмица 35,2, Штип и Скопје со 34 степени, Битола 32,7 степени, Прилеп 32,2 степени, Крива Паланка 31,6 степен, Берово 30,2, Охрид 29,5, Лазарополе 26,6 степени и Маврово 26,5 степени.
Од УХМР посочуваат дека на повеќето метеоролошки станици не се надминати многугодишните апсолутни температури, но се надминуваат многугодишните просечни вредности.
Според податоците, апсолутната температура измерена во септември во периодот од 1951 до 2018 година изнесува 39,7 степени во Демир Капија и Гевгелија со 39,2 степени.
Топло време со високи температури во септември е регистрирано и во 2011, 2012 и во 2015 година.
Од Управата посочуваат дека во изминатите месеци недостигаат врнежи и дека голема е веројатноста за појава на суша во наредниот период.