Македонската репрезентација нема да игра во осминафиналто на Европското првнство во одбојка, откако синоќа Финска ја совлада Турција со 3-2 (25-20, 15-25, 18-25, 25-23, 15-12). На Македонија и’ беше неопходна било каква победа на Турција за да биде четврта на табелата од шесте репрезентации во групата кои одат понатаму.
Турците и Финците синоќа го постигнаа единствениот резултат што им одговараше на двете репрезентации. На Финците им беше неопходна победа за осминафинале. Турците, пак, и со пораз веќе имаа обезбедено осминафинале, само што со евентуален пораз од 1-3 или 0-3 од Финска ќе и’ го препуштеа третото место на скандинавската репрезентација. Вака, и Турција остана трета и Финска отиде во осминафинале. Но, често е така кога други ти ја кројат судбината.
Македонија настапи на своето прво европско првенство и не разочара. Првите три меча ги загубивме од Финска, Турција и од Русија, а потоа дојдоа и двете победи против Белорусија и домашната Словенија. Формата одеше во нагорна линија и штета е што не видовме дали ќе продолжеше и до каде можеше да оди тој прогрес во осминафиналниот натпревар со Франција што ќе го игравме ако синоќа Турција ја победеше Финска.