Амбасадата на Швајцарија го доби највисокото општинско признание за значајни остварувања во 2019 година по повод „7 Септември” – Денот на ослободувањето на Кочани. Признанието беше доделено на свечена седница на Советот на општината како благодарност за донацијата од 21 милион швајцарски франци за изградбата и опремувањето на регионалната пречистителна станица за отпадни води.
-Изградбата на станицата за третман на отпадните води е еден од најважните инфраструктурни проекти во регионот што беше ставен во функција пред околу два месеца, а стана реалност со помошта што ја добивме од Швајцарскиот државен секретаријат за економски работи – SECO. Во рамки на објектот се изгради и фотонапонска соларна централа за електрична енергија, а со финансиска поддршка од граѓаните на Швајцарската конфедерација денеска почна и реконструкцијата и проширувањето на патот до селото Мојанци, каде се наоѓа пречистителната станица, истакна градоначалникот Николчо Илијев.
Во рамки на свеченоста „75 години слободно Кочани” наградата за животно дело постхумно му беше доделена на Драган Петров, директор на поранешна „Нова трговија” и иницијатор за изградбата на трговскиот центар во Кочани.
На сите противпожарни единици и шумски стопанства кои помогнаа во гасењето на неодамнешниот голем шумски пожар на Осоговските Планини им беа доделени посебни признанија.
Благодарница за покажаната хуманост и во спасувањето човечки живот доби пожарникарот Драган Апостолов, а за поддршката во зачувувањето на природата и заштитата на Осоговските Планини признание добија Македонското еколошко друштво и „Фармахем” од Скопје.
На свеченоста по повод одбележувањето на ослободувањето на градот, градоначалникот Илијев направи краток осврт на реализираните проекти во периодот меѓу двете празнувања, а концерт одржа и триото „Џентлмен”.
МИА