Куќа и стан во изминатите 24 часа изгореа во два различни пожари во Куманово.
Како што информираат од Регионалниот центар за управување со кризи, вчеравечер околу 20:30 часот е излезено на терен на улицата „Гоце Делчев” каде избил пожар во семејна куќа. Десетмина пожарникари со три противпожарни возила излегле на терен, по што околу 00:20 часот пожарот е локализиран.
Куќата е целосно изгорена, а од пламените јазици е опожарен и еден стан од зградата која се наоѓа во непосредна близина.
Во втор пожар, стан изгоре во станбена зграда лоцирана на улицата „Карадачки одреди” во населбата Тоде Мендол. Околу 21:50 часот на терен излегле шестмина пожарникари од Територијалната противпожарна единица Куманово со две возила и огнените јазици успеале целосно да ги ликвидираат околу 20:30 часот.
Причините за избувнување за два пожари, како и настанатата материјална штета допрва ќе се утврдуваат.
Никола Ивановски