Специјалниот обвинител, Роберт Мулер заклучил дека претседателот Доналд Трамп и неговата кампања не заговарале со Русија за влијание врз претседателските избори – се наведува во синоќа објавениот резимираниот извештај од јавниот обвинител на САД, Вилијам Бар. Тој ги обелодени главните точки од истрагата на Мулер во резимиран извештај за 22-месечната истрага поврзана со наводниот заговор на кампањата на Трамп со Русија.
На прашањето за тоа дали Трамп се обидел да ја попречи правдата со мешање или со обид да се осуети истрагата на Малер, Бар истакна дека „извештајот не заклучува дека претседателот извршил криминал, но исто така не го ослободува“.
Јавниот обвинител го испрати сумаризираниот извештај до Конгресот, при што се истакнува дека нема доволно докази да се заклучи дала Трамп направил кривично дело – опструкција на правдата.
Малер ја заврши истрагата за вмешаноста на Русија и го достави својот извештај до Министерството за правда во петокот.
Јавноста во САД бара истрагата за наводниот заговор на Трамп со Русија да се објави интегрално. Конгресот за тоа неодамна гласаше едногласно. Сепак, Бар има дискрециско право да не објавува делови од извештајот за кои се смета дека се доверливи.
Американските даночно обврзници платија 25 милиони долари за речиси двегодишната истрага на Малер чиј епилог е околу триесетина обвинети и осудени поединци.
Резимираниот извештај на Бар открива дека во текот на истрагата специјалниот обвинител ангажирал 19 адвокати и 40 агенти на ФБИ кои работеле со него, издал повеќе од 2,800 судски покани, разговарал со околу 500 сведоци и извел близу 500 претреси.