Напаѓачот на двете џамии во Крајстчрч, во кои беа убиени 50 луѓе, работел сам, но можеби имал и поддршка – посочува новозеландскиот полициски комесар, Мајк Буш. Според него, полицијата верува дека Брентон Тарант е единствениот напаѓач, но не е исклучено тој да имал поддршка од други луѓе и оти тоа е „многу важен дел од истрагата“.
Напаѓачот, Австралиецот Брентон Тарант, беше уапсен неколку моменти по нападот во петокот и обвинет за убиство, а судијата завчера рече оти можеби тој ќе се соочи и со други обвиненија.
Премиерката на Нов Зеланд, Џасинда Ардерн денеска изјави дека нејзиниот кабинет ги договорил измените на Законот за оружје, иницирани по нападот во Крајстчрч, кои ќе бидат донесени најдоцна 10 дена по нападот.
Во петокот, Тарант изврши напади врз две џамии, при што загинаа 50 лица, а повеќе од 40 се повредени.