Претседателот на венецуелското Национално собрание, Хуан Гуаидо синоќа се прогласи за вршител на должноста претседател на Венецуела.
„Објавувам дека формално ги преземам надлежностите на националната извршна власт како претседател на Венецуела, за да се стави крај на узурпацијата“, изјави Гуаидо во обраќање на антивладиниот протест во Каракас, кој е само еден од повеќето што деновиве се одржуваат во Венецуела и на кои се бара оставка од претседателот Мадуро.
По самопрогласувањето на Гуаидо, се огласи американскиот претседател Доналд Трамп, кој соопшти дека САД го признаваат спикерот на Парламнетот за в.д. претседател на Венецуела. Трамп при тоа ги повика и другите западни земји да го признаат Гуаидо за претседател, со што, според него, ќе се засили притисокот врз Каракас.
По Трамп, се огласи и генералниот секретар на Организацијата на американски држави (ОАС), Луис Алмагро, кој истакна дека и овој панамерикански блок го признава Гуаидо за времен претседател на Венецуела. По САД, и други држави од тој континент соопштија дека го признаваат Гуаидо за привремен претседател на Венецуела.
Канада, Бразил, Аргентина. Колумбија, Парагвај. Чиле, Перу, Гватемала, објавија дека го признаваат лидерот на опозицијата Хуан Гуаидо за привремен претседател на Венецуела.
Мексико и Боливија сепак, соопштија дека и понатаму го признаваат Николас Мадуро за претседател на таа јужноамериканска држава.
Тој беше резибран за претседател на избори одржани лани во мај, кои ги бојкотираше опозицијата и чии резултати не беа признати од ОН, ОАС, ЕУ и повеќе западни земји, вклучително и САД и Австралија, со образложение дека при гласањето имало многу нерегуларности и не било во согласност со демократските стандарди.
Мадуро во меѓувреме објави дека ги прекинува дипломатските односи со САД и на нивните дипломати им даде рок од 72 часа да ја напуштат државата. Тој нагласи дека САД прават „огромна грешка“ обидувајќи се да наметнат претседател на Венецуела и ги критикуваше другите држави дека го следел примерот на Вашингтон. Мадуро рече дека опозицијата се обидува да изврши државен удар и ја повика армијата да го сочува единството.
Армијата на Венецуела одби да го признае претседателот на Парламентот, Хуан Гуаидо за привремен претседател – соопшти министерот за одбрана Падрино Лопес.
– Војниците не го признаваат претседателот кој ни е наметнат под влијание на странски интереси и самопрокламирано, незаконски. Вооружените сили го бранат Уставот и го гарантираат националниот суверенитет, напиша Лопес на Твитер.