Во селото Ваташа, во спомен куќата на народниот херој Страшо Пинџур денеска се одбележаа 76 години од неговото убиство. Делегации од сојузот на борци од Кавадарци и од локалната самоуправа положија цвеќе на бистата на Страшо. Тој е роден на 5 март 1915 години и живеел со неговата баба Наца во Ваташа.
За неговиот живот и револуционерни актвности говореше кустос – историчарот Марија Михова.
„Како последица на силните измачувања Страшо Пинџур умира. Истата вечер неговото тело било однесено во непознат правец и до денеска не се знае неговиот гроб. За неговата активност во организирањето на македонскиот народ за борба против фашистичкиот окупатор, Страшо Пинџур е меѓу првите прогласен за народен херој во Македонија“, рече Михова.
По 42 години од отворањето на Спомен куќата на Страшо сменети се паноата со слики, а санирани и оштетувањата во куќата.
„Во рамките на проектот, сменети беа старите паноа кои беа оштетени, поради пукање на цевка и влага. Се санираше и оштетувањето на ѕидовите од самата влага, а се поправи и влезната врата. Се исчистија и средија фотографиите кои говорат за животниот пат на Пинџур, информира директорката на кавадаречкиот музеј, Весна Ѓорѓиева. Таа вели дека станува збор за проект од национален интерес за реновирање и дополнување на историската поставка, поддржан од Министерството за култура.
Ангел Данов