Заврши реконструцкијата на двете детски градинки во Гостивар, каде поради обновата згрижувањето на децата не се одвиваше според редовниот распоред. За нивна реконструцкија беа потрошени околу 2 милиони денари од буџетот на гостиварските градинки.
Реконструкцијата на двете градинки е првиот сериозен зафат направен во детските установи во Гостивар после десет години. Реновирани се санитарните јазли, обновени се занималните, заменет е подот, вратите и прозорците. Извршена е и санација на водоводната инсталација и осветлувањето. Се очекува наскоро да бидат поставени нови детски гардероби и табли за цртање.
Наредната година се планира да се обноват фасадите на детските градинки, како и набавка на ново возило и отворање на нова детска градинка во село Чегране, едно од најголемите села во Македонија кое е речиси споено со Гостивар.
Зоран Димовски