Матичните стоматолози од Охрид денеска јавно го изразија нивното несогласување со новиот договор што им е понуден од Фондот за здравство, за кој сметаат дека е штетен како за нив, така и за пациентите.
Со денешниот протест тие побараа зголемување на буџетот за примарната стоматологија што изнесува помалку од еден отсто од вкупниот буџет за здравство или четвртина од буџетот наменет за општите матични лекари.
„Револтот го искажуваме заради катастрофалната состојба на стоматолошката фела, чија просечна плата изнесува 15 илјади денари. Бараме отпочнување преговори за промена на подзаконските акти, уредбата за мрежата и усогласување на Договорот со законските одредби на Законот за здравствено осигурување и Законот за здравствена заштита. Истовремено бараме одложување на потпишување на договорот, а континуитетот на работењето да се запази со потпишување анекс на постојните договори за шест месеци“, порача д-р. Мирјана Ангеловска.
За состојбата во која се наоѓаат општите матични стоматолози зборуваше и нејзината колешка д-р Лидија Трајческа нагласувајќи дека истата е исклучително неповолна, најмногу поради неправилната поделба на средствата од буџетот предвидени за финансирање на примарната здравствена заштита:
„Ние сме во многу тешка финансиска состојба, немаме доволно средства за нормална работа. Расходите се многу големи, приходите мали, пациенти нема доволно за покривање на тековните трошоци“.
Матичните стоматолози од Охрид уште нагласија дека јавноста треба да биде запознаена оти нивниот капитациски бод е далеку помал од оној предевиден за лекарите по општа медицина, притоа забележувајќи дека воведувањето на новите „токени” за пријавување пациенти значат дополнително финансиско оптеретување за нив.
Општите матични стоматолози од Охрид најавија дека доколку надлежните не ги прифатат нивните барања, ќе преземат порадикални мерки како протести на национално ниво, па и судско оспорување на Договорот, зашто сметаат дека тој е противзаконски.
На територијата на Општина Охрид моментално има 140 стоматолошки ординации, од кои 55 имаат склучено договори за работа со Фондот за здравствена заштита.