Шест лица се повредени во сообраќајна незгода која се случила вчера во Долно Палчиште. Меѓу нив било и двегодишно дете кое е пуштено дома, а останатите се задржани на болничко лекување.
Пет лица се повредени и задржани на болничко лекување, а двегодишно дете е пуштено дома, откако биле повредени во сообраќајна незгода која се случила вчера околу 17 часот и 50 минути, на локалниот пат Пирок-Тетово, во Долно Палчиште. Според информациите на СВР Тетово, во неа учествувале две патнички моторни возила: „Голф” со тетовски регистерски таблици, управувано од 39-годишна жена од Џепчиште и „Форд мондео” со италијански таблици, што го управувал 37-годишник од тетовско Ново Село.
Извршен е увид и се утврдува причината за несреќата, околностите во кои се случила и се друго.
Од СВР Тетово информираат и за пронајдено оружје во домот на жител на село Пирок. Во претресот, реализиран со судска наредба, од неговиот татко одземена е ловечка пушка калибар 16 милиметри, расклопена на три дела, која била пронајдена во дрвен сандак. Педесет и деветгодишниот жител на Приок лишен е од слобода за целосно расчистување на случајот.
Зоран Димовски