Со трагичен епилог заврши вчерашната, тричасовна потрага по девојче кое синоќа паднало во водите на Вардар во Гостивар. Телото го нашле жители на селото Балиндол, околу 22 часот, кои и го пријавиле слулчајот во полиција – објави Македонската информативна агенција.
Од СВР Тетово информираа дека полициски служебници кои дошле на местото, го извлекле од водата, а лекар од брзата помош констатирал смрт.
Според првичните информации се работи за 17 годишно девојче од гостиварското село Здуње. Тоа паднало во водите на Вардар, околу 19 часот во близина на гостиварската болница откако претходно се обидувало да се одбрани од куче бездомник. Бранејќи се, стигнало до самиот брег на кејот и изгубило рамнотежа и паднало во водите на Вардар.
Сведоци на трагедијата биле минувачи кои повикале помош, по што беше организирана потрага, но и покрај вложените напори не е спасено.