Во изминатиот временски период стана зачестена пракса платите на вработените на јавните универзитети да се исплатуваат со задоцнување, надвор од законски предвидените 15 дена по изминување на исплатниот период – реагираше денеска Независниот академски синдикат.
Од Синдикатот велат дека на овој начин се загрозува правната сигурност на вработените на јавните универзитети и се прекршуваат одредбите од чл.109 од Законот за работни односи (ЗРО) и чл. 66 од Колективниот договор за високото образование и наука, а работниците, особено оние чиишто плати се на ниво на минималната плата или блиску до неа се доведуват во исклучително незавидна и
понижувачка економска положба.
Имајќи предвид дека наставниот кадар во високото образование многу често е принуден да ги плаќа од сопствени средства службените патувања за учество на конференции и стручни средби, како и набавката на неопходната стручна литература, со ненавремената исплата на платата сериозно се доведува во прашање и извршувањето на редовните работни обврски кои се предвидени со договорите за вработување – констатира Синдикатот.
Од таму додаваат дека сите овие задоцнувања се направени без претходно писмено известување од работодавачот, за евентуалната промена на денот на исплаќање, како што впрочем е
наведено во чл.109 ст.4 од ЗРО, во кој стои „Работодавачот е должен претходно писмено
да ги извести работниците за денот на исплаќањето и за секоја промена на денот на исплаќањето.“
Независниот академски синдикат за сето го ова го известил во писмена форма и Министерот за образование и наука, како ресорен министер кој ја контролира законитоста на работењето на високообразовните институции и има обврска да се грижи за почитување и имплементација на колективниот договор. Синдикалците бараат во најкус можен рок транспарентно да бидат образложени причините за ваквите задоцнувања и да бидат преземени сите мерки во надлежност на Министерството за образование и наука за почитување на законските одредби и навремена исплата на платите.
Квалитетот на високото образование и науката, што во овие години на континуирана светска кризна состојба е сериозен предизвик за сите општества, не може да се обезбеди доколку вработените во високообразовните институции ги немаат основните услови за работа и егзистенција – предупредија од Независниот академски синдикат.