Италијанката Маргерита Абито ја пее „Македонско девојче“ со многу љубов и возбуда, а публика во салата на Филхармонијата не го криеше задоволството и ја награди со голем аплауз.
Вака изгледаше вчера на концертот на „Барселона Џипси Балкан Оркестра“, чиј вокал е оваа супер талентирана Сицилијанка.
Бендот со право го носи ова име, биејќи е составен од музичари од различни места на Европа. Иван Ковачевиќ е од Србија, свири контрабас, па покрај руските и циганските романси, тој им ја всадил љубовта кон балканската музика, меѓу кои е и македонската.
Потоа Стелиос Тогиас, кој свири на перкусии е од Грција, гитаристот Жулиен Шанал е од Франција, додека Чави Пендон, Пере Ноласке Туру и Фернандо Салинас се од Шпанија.
Се слушнаа и „Море сокол пита“ и „Јовано Јованке“, публиката стана на нозе и и подари огромен аплауз.
Маргарита не ги разбира јазиците на кои пее, но песни ги пее со таква леснотија, како да е израсната на Балкан и да ги зборува сите јазици.
– Неверојатна жена ја напушти играта на денешен ден на 11 декември пред шест години, таа беше скопјанка Есма Реџепова. Затоа, вечерва ќе пееме во нејзина чест, и во чест на сите жени кои се бореа за својата слобода“, рече Маргарита и запеа во чест на Есма.
– Настапуваме во многу држави низ светот и нас не нè интересираат граници, химни, симболи, сакаме да го споделиме тоа што вечерва го споделуваме со вас“, рече Иван Ковачевиќ,
Фото: Вангел Тануровски
