Уапсените екстремни десничари планирале државен удар, а Бундесверот ќе има доволно муниција само за два дена борби, тврдат германски медиуми – ММС
ММС

Објавено на: 12/7/22 11:33 AM

Уапсените екстремни десничари планирале државен удар, а Бундесверот ќе има доволно муниција само за два дена борби, тврдат германски медиуми

Германскиот весник „Шпигел“, повикувајќи се на полициски извори, пренесува дека 25-те приведени лица, кои се осомничени дека дејствувале од позиици на десниларски екстремизам планирале државен удар, што би се извел до упад во Бундестагот.

Како што се наведува, специјалните полициски сили ја спровеле операцијата „Соко-сенкс“ истовремено во 11 од вкупно 16 сојузни држави.

По наредба на сојузното Обвинителство засега се приведени вкупно 25 лица, кои се осомничени дека се членови или поддржуваат терористичката организација „Граѓани на Рајхот“.

Претресот е извршен во 130 куќи, канцеларии и други објекти.

Се нагласува дека планот на екстремистите бил да извршат вооружен напад врз парламентот и да ги држат во заложништво политичарите. Тие очекуваа дека некои делови од безбедносните структури ќе се солидаризираат со нив, што ќе овозможи државен удар.

Обвинителството соопшти дека меѓу приведените е и една руска државјанка.  Таа е осомничена дека посредувала меѓу лидерите на заговорот и претставници на Русија. Уапсените се осомничени дека се обиделе да воспостават врска со претставници на Русија, но не добиле поддршка, додаваат од Обвинителството.

Обвинителството истакна дека нема причина да се сомнева дека руските функционери ги поддржувале заговорниците.

Руската амбасада во Германија соопшти дека не е информирано дека меѓу осомничените за планирање државен удар во Германија има и руски државјанин.

Осомничените планирале да формираат привремена воена влада и да водат преговори со голем број земји.

Во рамките на операцијата учествувале  3.000 припадници на безбедносните служби кои извршиле претреси на 137 објекти во сопственост на 52 осомничени, додека 25 од нив се уапсени, пренесува германски „Билд“.

Билд објави дека мрежата е формирана околу принцот Хајнрих VIII, кој е класифициран како безбедносна закана за земјата и во моментов е во бегство, како и поранешната пратеничка на АФД и берлинска судијка Биргит М.В.

Двајцата наводно сакаат да ја сменат сегашната влада.

Клопчето наводно почнало да се одмотува кога истражителите влегле во трага на тајна организација од Хесен, кога во август 2022 година до властите било пријавено постоење на тајна „антиуставна група“.

А изминатите денови во германските медиуми повикувајќи се на неименувани извори се појавија алармантни наслови за состојбата на армијата, кои сугерираат дека Бундесверот ќе има доволно муниција само за два дена борби.

Според НАТО стандардите секоја земја-членка треба да има резерви на муниција за 30 дена борб, а за надоместување на недостатокот, Германија мора да одвои 20-30 милијарди евра, наведуваат експертите за одбрана.

Германската армија подолг период се соочува со проблеми како неисправни тенкови, хеликоптери и пиштоли, како и несоодветна зимска облека за војниците.

Иако канцеларот Олаф Шолц најави пресврт и зголемување на трошоците за одбрана, како и еднократен „специјален фонд“ од 100 милијарди евра за модернизација на армијата, повторно се појавуваат сомнежите за капацитетите на германската војска.

Земјите-членки на НАТО во североисточна Европа веќе се загрижени дека Германија нема да биде воен партнер на кој можат да се потпрат.

На прес-конференцијата во Берлин на крајот на октомври, летонскиот министер за одбрана Артис Пабрикс им постави провокативно прашање на своите европски колеги: „Ние сме подготвени да умреме, а вие? Обраќајќи им се на Германците, тој рече: „Многу ќе зависи од воената моќ на вашата земја. Жал ми е што го кажувам тоа, но вашата воена моќ во моментов не постои“.

Германија потпиша договор за купување на 35 американски борбени авиони Ф-35, кои ќе ја заменат застарената флота Торнадо. Но, тие можеби нема да бидат подготвени за употреба до 2027 година.

Написите за недостигот на муниција делумно се појавија по испораката на оружје во Украина, но има и други причини.

Во изминатите неколку децении, Бундесверот продаде многу од своите бункери од времето на Студената војна, што значи дека армијата, ако и само ако има муниција за 30-дневна борбена операција како што е пропишано од НАТО, ќе мора да најде складишта за тоа.

МИА