Не, не ништо не, овие години не промениле, срце полно рани, рани, рани, рани, во душа празни страни, непишани романи… вака гласи рефренот од новата тема на ДНК, со наслов „Романи“, а со која момците го заокружуваат последниот студиски материјал „Дваесет“.
„Романи“ е една убава љубовна тема. Метафорична приказна, несекојдневен спој и песна со неочекуван рефрен, нешто што ете го чувавме како последно парче од приказната наречена „Дваесет“, албум што значи заокружување на овој наш 20-годишен јубилеј“, велат Панчо и Андреј.
Денес, пак, на последната средба со новинарите, рекоа дека круна на славењето ќе биде големиот концерт закажан на 3 декември во арената „Борис Трајковски“, Панчо и Андреј заедно со сите свои фанови од сите генерации ќе го одбележи убавиот јубилеј.
„Романи“ е дванаесетто парче на албумот, што во продажба ќе го има на самиот концерт, а освен што дел од собраните средства ќе бидат насочени во хуманитарни цели, сите оние кои сакаат да имаат потпис и фотографија со Панчо и Андреј тоа ќе можат да го направат по завршувањето на концертот. Панчо и Андреј ќе останат во салата сѐ додека фановите тоа го бараат од нив.
На материјалот уште се ставени и темите „Кога би знаела сѐ“, „Ромео и Јулија“, „Ние“, „Македонија на Европско“…
Видеото за „Романи“ е снимено во Турција и е со потписот на Даниел Јовески. Во кадрите, кои ја следат приказната од текстот, освен Панчо и Андреј се појавува и моделот Ана Парлапанова.
Дел од средствата на концертот ќе бидат наменети за хуманитарни цели, односно во Фондацијата „Марко Божиновски“, младиот ракометар, кој почина во сон.
Панчо и Андреј рекоа дека родителите кои ќе сакаат со своите деца да бидат дел од концертот, со себе да понесат идентификација, бидејќи за деца до девет години нема да е потребен билет.
Фото: Вангел Тануровски