Една минута по полноќ, на 12 октомври 1999 година, во Сараево е роден Аднан Мевиќ, 6-милијардитиот жител на планетата Земја, јавува Агенција Анадолија (АА).
Аднан денес има 23 години, магистрирал на Економскиот факултет, бизнис економија. Меѓутоа, нема постојан работен однос во струката, што е негова желба.
Како што изјави за АА, не се чувствува посебно за титулата 6-милијардит жител на планетата Земја.
„Не се чувствувам поважен од другите луѓе. Тоа не ми одговара. Секогаш се трудам да најдам заеднички јазик со сите и никогаш не сум се пофалил дека сум бил тоа и тоа“, рече Аднан.
Во 1999 година, тој и неговата мајка Фатима биле посетени во породилиштето во Сараево од тогашниот генерален секретар на Обединетите нации, Кофи Анан, кој потоа рекол: „Ниту страшната војна, ниту безмилосната опсада на Сараево, па дури ни нечовечката политика на етничките чистење, не можеа да го спречат ова, како ниту многу други раѓања во Босна и Херцеговина. Се надевам дека ќе го прославите денешното раѓање обезбедувајќи повторно раѓање на толерантна и мултирелигиозна атмосфера што некогаш ги карактеризираше Сараево и БиХ. Тоа треба да биде нашиот заеднички подарок за шестмилијардитото бебе на планетата.“
„Познат сум по тоа што сум 6-милијардитиот жител на планетата Земја. Сепак, нема потврда дека сум шестмилијардитиот жител на планетата Земја. Затоа не се истакнувам, јас сум нормален тип, живеам и работам нормално, се дружам со сите. Имав некои привилегии поради тоа. Го посетив Реал Мадрид, отидов да го посетам Интерпол, се сретнав со генералниот секретар на Интерпол и слични работи“, изјави Аднан.
Тој рече дека нема корист од оваа титула.
„Може да се каже дека постои само како некаква награда која е потпишана меѓу моите родители и покојниот претседател Алија Изетбеговиќ, а тоа е да се издвојат околу 200 марки месечно како некаква грижа, до крајот на моето школување“, објасни Аднан.
Со оглед на тоа што моментално не може да најде работа во професијата и дека во тоа не му помогнала „титулата“ шестмилијардит жител на планетата Земја, тој размислува и за напуштање на државата доколку не успее да се вработи во следниот период.
„Гледате каква е моменталната состојба во државата, што се случува со младите, не им се дава можност да најдат работа во својата област, затоа младите нè напуштаат, поради непотизам и високо ниво на корупција. …Ако не најдам работа во мојата област, планирам да заминам. Сакам да одам во Австрија, Германија или Швајцарија, можеби“, изјави Аднан.
Овој млад човек живее со неговата мајка Фатима, а неговиот татко починал во 2012 година.
„Ние двајца некако се бориме низ животот, таа има работа со полно работно време“, рече Аднан.
Живее во Високо, а како што рече, тоа е мала чаршија, сите се познаваат, па неговата популарност како шестмилијардит жител на планетата Земја не е толку изразена.
„По 23 години, единствениот пишан документ што е сличен на оној на ОН, што не го добив од нив, го добив на доделување на наградите Печат на Вечерњак во Мостар. Никој од ОН никогаш не ме посетил“, рече Аднан, кој до полнолетството ги прославувал своите родендени во кругот на функционерите кои го посетувале.
Среќен е што денес не е така и што може да го прослави роденденот како и секој друг човек – во кругот на семејството.
Извор и фото: Анадолија агенција