Во вторник наредната недела ќе се распише јавен повик за распределба на социјални станови во Свети Николе, најавија денеска министерот за транспорт и врски, Благој Бочварски и директорот на Јавното претпријатие стопанисување за деловен и станбен простор, Зоран Ѓеоргијев.
„Зградата брои 48 станбени единици и ќе биде дом за исто толку социјално ранливи семејства од оваа општина.На јавниот повик можат да аплицираат шест категории граѓани и тоа, деца без родители кои до својата 18-та година биле згрижени во институции за деца без родители,корисници на право на гарантирана минимална помош, лица погодени од елементарни – природни непогоди, лица со попреченост и семејства со лица со попреченост,лица припадници на Ромската заедница- социјално загрозени согласно Стратегијата за Ромите и самохрани родители со малолетни деца, рече денеска Бочварски, при увидот на зградата.
Огласот ќе трае 30 дена а освен на веб страната на Министерството за транспорт и врски, и ќе биде објавен и во Центарот за социјални работи во Свети Николе.
Директор Ѓеоргијев истакна дека објектот се состои од приземје, четири ката и поткровјe, со вкупна станбена површина од 1997,43 метри квадратни и дополнително со 48 подруми, а становите се со површина од 35 до 47 метри квадратни. Вкупната инвестиција изнесува 84.298.137 денари. Посочи дека досега се изградени 22 вакви објекти, во завршна фаза се во Демир Капија и Неготино, а во изградба се во Бутел, Дебар, Кочани и Сарај. Планирана е и изградба на нови социјални згради во Пехчево, Прилеп и Штип.