Сменетиот директорот на ЈП Водовод и канализација – Скопје, Златко Перински испрати соопштение во кое даде свое видеување на неговата смена од градоначалничката на Скопје, Данела Арсовска.
-Некаде околу 10 часот денес добив известување од градот дека сум разрешен од позицијата прв човек на Водовод со образложение дека наводно сум влијаел на процесот при одлучување за изградба на Пречистителната станица. На крајот на јули добив допис од градоначалничката Арсовска која бара од мене промена на членовите на евалуационата комисија за изградба на пречистителната станица. Немаше никакво образложение за ваквата постапка, а причините поради кои ова го бара треба самата Арсовска да ги објасни. Јас за ова ја известив Европската Инвестициска Банка која е банка лидер и која е кредитор на самиот проект тежок 160 милиони евра за ваквиот чекор и побарав мислење за ваквото барање. ЕИБ одговори за ваквото барање на Арсовска негативно. Значи она што го бараше градоначалничката не е одобрено од банката лидер. Јас не можам да си дозволам незаконито работење по ниту една цена и било кога. Ниту пак ќе подлегнам на притисоците. Затоа она што јас го следам е единствено законот и мислењето на релевантните институции, вели Перински и додава:
Го известив Градот и ја известив градоначалничката за одлуката на ЕИБ. Ваквата одлука на Арсовска за мое разрешување доаѓа на денот кога комисијата треба да ги отвори понудите. Почитувањето на законот никогаш не е самоволие како што тоа го пишува Арсовска, туку единствена обврска. И да не ме разрешеше, јас бев подготвен да си заминам доколку цената е да го прекршам законот, како што таа бараше од мене со разрешување на членовите од комисијата, вели тој.
Што се однесува до самиот проект за пречистителна станица, објаснува Перински, тоа е проект на Владата, Водовод и со кредити од Европската Инвестициска Банка и Европската Банка за обнова и развој.
-Сите постапки кои се превземени се одобрени и потврдени како беспрекорни од банките кои вршат надзор на истите. Со индигнација ги одбивам сите пишувања, сите обвинувања против мене. Барам од медиумите да бараат одговор зошто градоначалничката бара разрешување на членовите на комисијата… Јас стојам на располагање на сите институции и ги повикувам да го испитаат овој случај се до конечно расветлување на вистината. Затоа што постои можност градот да остане без капитален проект кој е од исклучителна важност за скопјани. Од Водовод си заминувам со чист образ, со многу желба овој процес да успее. Благодарност и до банките кои се партнер во изградбата на пречистителната станица, вели екс директорот, притоа објаснувајки ги сите достигнувања во ова ЈП за време на неговото директорување.