Неколку објавени извештаи на Светската метеоролошка организација кои се однесуваат на климатските промени, укажуваат дека Балканот во следните години ќе стане област зафатена со суши. Водата ќе ја има се’ помалку и помалку, а за да се оладиме, ќе треба да го поминеме летото на море, во најдобар случај, наесен, каде што може да се сретнеме со се’ поопасни инвазивни видови на морски животни.
СМО смета дека веќе се остваруваат најавите, откако Европа пред крајот на мај годинава континентот беше погоден со бран неподнослива врелина.
Она што некогаш беше карактеристично за месеците јули или август, поради климатските промени, се’ повеќе се претвора во месеци на агонија што со себе носи мноштво катастрофални промени. Не само екстремни горештини, туку и други екстремни појави кои ги придружуваат, а има и други, не безначајни фактори, како економијата и здравјето на луѓето, кои ќе мора да се прилагодат на животот во многу потешка клима од досегашната.
Идентификувани се четири главни ризици како последица на климатските промени во Европа: зголемена смртност предизвикана од високите температури, закани за растенијата предизвикани од топлотен стрес и суши, дефицит на вода, поплави и зголемување на нивото на морето. Иако веќе од година во година се соочуваме со овие ризици, со натамошно зголемување на емисиите на стакленички гасови, може да се очекува тие да бидат почести и поизразени.
Топлината не е единствениот проблем, бидејќи ќе биде придружена со голем број други екстремни појави и временски непогоди – суши, поплави, ветрови, град, порои, атмосферски вртлози… Со пожари ќе биде загрозена и медитеранската област, додека климатските промени ќе имаат големи последици по здравјето на луѓето, животните трошоци, туризмот, но и достапноста на вода за пиење. За 20 до 30 години ќе има голем притисок врз водата за пиење, бидејќи ќе се бориме со екстремни суши.
Затоплувањето ќе влијае и на студените екстреми, па може да очекуваме поретки и понеизразени студени бранови. Оваа промена може да има позитивни последици доколку се забележи влијанието на студот врз здравјето на луѓето, особено кај хроничните кардиоваскуларни пациенти. Сепак, во просек, поблагите зими со помалку снег во иднина може да ја нарушат хидролошката рамнотежа неопходна за сезоната на растење, да го забрзаат почетокот на цветањето на алергените растенија и со тоа да го зголемат бројот и подолго траење на сезоната на алергии.
Во Извештајот на СМО за 2021 година, пожарот во Малешевијата е споменат како еден од поголемите во регионот, кој загрози човечки животи.
„Големите жештини го зафатија поширокото Медитеранскиот регион во неколку наврати во текот на втората половина на летото. Исклучително топло беше во втората недела од август. На 11 август агро – метеоролошката станица во близина на Сиракуза во Сицилија, Италија покажа 48,8 ° C, што е привремен европски рекорд, додека Кајруан (Тунис) достигна рекордни 50,3 ° C. Монторо (47,4 ° C) постави национален рекорд за Шпанија на 14 август, додека истиот ден Мадрид (аеродром Барахас) го имаше својот најтопол ден со рекордни со 42,7 ° C. Претходно, на 20 јули, Чизре (49,1 ° C) постави турски национален рекорд и Тбилиси (Грузија) го имаа својот најтопол ден рекорд (40,6 ° C). Се случија големи шумски пожари низ многу делови од регионот, со Алжир, јужна Турција и Грција,кои се особено лошо засегнати. Над 40 смртни случаи се случија во алжирските пожари, Франција, Италија, Северна Македонија, Либан, Израел, Либија, Тунис и Мароко исто така доживеа значителни шумски пожари за време на летниот периодот“, пишува во извештајот.
Какви екстреми се најавуваат за Европа?
Европа, од друга страна, е сведок на нагло зголемување на температурата, бидејќи делови од Шпанија се соочуваат со смртоносен топлотен бран, со сериозни предупредувања дека температурата ќе достигне 50 степени.
Топлотните бранови предизвикуваат сè повеќе смртни случаи секое лето. Најмалку 1.634 луѓе починале во Британија во летото 2021 година, во споредба со 2.556 во летото 2020 година.
Порастот на температурите ги натера научниците да се загрижат поради недостигот на акција на глобално ниво со цел да се реши сериозната климатска криза. Во Шпанија, на пример, загриженоста на истражувачките институции се прошири на улиците, кога илјадници научници излегоа на демонстрации во април барајќи нивниот глас да се слушне.
Топлотните бранови го влошуваат загадувањето на воздухот, што може да предизвика смрт, особено за оние кои страдаат од тешки здравствени состојби поврзани со респираторниот систем.