Рускиот претседател Владимир Путин го опиша сопственото кумче како „странски агент“ како одговор на нејзините ставови за руската инвазија на Украина, јавуваат британските медиуми.
Ксенија Собчак (40) се кандидираше против Путин на претседателските избори во 2018 година, а со рускиот претседател е поврзана преку нејзиниот татко Анатолиј Собчак, кој се смета за одговорен за подемот на кариерата на Путин во политиката.
Путин ја крсти Собчак и ја познава уште од мала. Сепак, тој сега е подготвен да ја означи како „странски агент“, бидејќи „соработува со своите непријатели“ за време на кризата во Украина.
Истрагата на рускиот јавен комитет за откривање странска интервенција е во тек, со цел да се испита дали „Собчакова добивала пари од странство“. Под истрага е и нејзиниот онлајн медиум „Осторожно новости“. Доколку се најдат докази против Собчак, таа ќе биде означена како „странски агент“, предупредува Кремљ.
Таа објави на нејзиниот Инстаграм профил – кој беше блокиран поради наводната „екстремистичка природа“ во Русија – „Што да кажам? Се чувствувам горда“.
„Да се има сопствено мислење значи апсолутна победа“, рече таа.
Руската влада се повеќе го користи терминот „странски агент“ за да ги опише критичарите на Путин. Тие тврдеа дека бројни политички и медиумски групи во земјата биле во дослух со „руските непријатели“.
Ксенија Собчак ја спореди ситуацијата со напад врз дисидентите од советската ера, обвинувајќи ги приврзаниците на Путин дека користат „секој закон“ за да го блокираат.
Претходно оваа година, медиумите блиски до Кремљ тврдеа дека таа добила израелско државјанство и побегнала во странство.
„Јас сум Русинка, јас сум државјанка на Русија, никаде не се иселувам, немам друго државјанство“, одговори таа.
Кога влезе во политиката, Ксенија ги здружи силите со познатите критичари на Путин како Борис Немцов и Алексеј Навални. Нејзиниот татко бил еден од најистакнатите политичари во своето време, како и првиот демократски избран градоначалник на Санкт Петербург. Путин беше на неговиот погреб во 2000 година.
Мајката на Ксенија Собчак, политичарката Људмила Нарушова, исто така отворено зборува против режимот на Путин. Таа претходно тврдеше дека на регрутите кои завршиле во Украина им било наредено да се пријават во војска како војници со договор.
„Тие лежат таму, а кучињата скитници им ги гризат лицата. Некои не можат да се идентификуваат бидејќи нивните тела се јагленосани“, рече таа, мислејќи на зголемениот број на смртни случаи меѓу руските војници.
извор: Nova.rs
фото: kurir.rs