(Видео) „Дај боже да се пласираме на Светско, ќе направам торта на плоштад“, истакна Елиф Елмас за ТВ УЕФА

Македонската фудбалска репрезентација попладнево со чартер-лет замина за Палермо на полуфиналниот мундијалски бараж против Италија.

Пред заминувањето за Италија, македонските фудбалери претпладнево во Скопје го одржаа завршниот тренинг, кој беше од затворен тип на комплексот на Фудбалската федерација на Македонија.

Избраниците на селекторот Благоја Милевски утревечер од 19:30 часот ќе го одржат единствениот тренинг на стадионот „Ренцо Барбера”, а официјалната прес-конференција на македонскиот состав е закажана за половина час претходно.

Селекторот Благоја Милевски и репрезентативецот Елиф Елмас за УЕФА ТВ магазинот зборуваат за нашиот пат и можноста да бидеме дел од Светското првенство.

„Дај Боже да се пласираме на Светско првенство, а потоа ако треба на плоштадот ќе направам торта“, рече Елмас во видеото на ТВ УЕФА.

Полуфиналето од баражот за пласман на Светското првенство во Катар ќе се одигра в четврток со почеток во 20:45 часот.

Капацитетот на стадионот „Ренцо Барбера” во Палермо од 36.000 седишта ќе биде максимално исполнет, а „црвено – жолтите” од трибините ќе имаат поддршка од околу 1.500 македонски навивачи.

О.К.

фото: В. Тануровски