Во болницата во Бостон, одбиле да пресадат срце на маж, наведувајќи го фактот дека тој не бил вакциниран против Ковид-19 како една од причините. Според Би-Би-Си, на 31-годишниот диџеј Фергусон очајно му треба ново срце, но болницата во Бостон го отстранила од списокот за трансплантација, тврди неговиот татко Дејвид.
Дејвид Фергусон вели дека неговиот син не бил вакциниран бидејќи „тоа е спротивно на неговите принципи“, додавајќи дека диџејот „не верува во вакцини“. Во самата здравствена установа велат дека таква е политиката на болницата.
Што точно велат во болница?
„Со оглед на недостатокот на органи, правиме се што е во наша моќ за да се осигураме дека пациентите кои добиваат трансплантиран орган имаат најголеми можни шанси за преживување“, изјавија за Би-Би-Си од Бостонската болница „Brigham“ и „Women’s“.
Портпаролот на болницата рече дека болницата бара „вакцинација против КОВИД и дека начинот на живот на кандидатите за трансплантација резултира со најдобри шанси за успешна операција и оптимална веројатност за преживување на пациентот по трансплантацијата, имајќи предвид дека нивниот имунолошки систем е драматично компромитиран“.
Внимателно формулираната изјава од болницата, според Би-Би-Си, може да сугерира дека во одлуката за отстранување од списокот за трансплантација биле вклучени и други фактори, но болницата одбила да разговара за спецификите на случајот, повикувајќи се на приватноста на пациентот.
Од болницата додаваат дека повеќето од 100.000 лица на листите на чекање за трансплантација на органи нема да добијат орган во рок од пет години поради немањето на бараните органи. Диџеј Фергусон е хоспитализиран од 26 ноември поради наследен срцев проблем поради кој неговите бели дробови се полнат со крв, пишува на веб-страницата „GoFundMe“, која собира пари за Фергусон.
Организаторот за собирање на средства вели дека диџеј Фергусон стравува од воспаление на срцето, потенцијален несакан ефект на вакцината против Ковид – за која американскиот Центар за контрола и превенција на болести (ЦДЦ) вели дека е ретка и привремена. Фергусон стравува дека овој несакан ефект, со оглед на состојбата на неговото срце, може да се покаже опасен за него.
„Нема многу органи, а невакцинираните имаат многу помала веројатност да закрепнат по операцијата.“
ЦДЦ, инаку, препорачува вакцинација и засилена доза за сите приматели на органи и за луѓето од нивниот внатрешен круг. Др. Артур Каплан, шеф на одделот за медицинска етика на Медицинскиот факултет на Универзитетот во Њујорк, рече дека имунолошкиот систем на секој пациент е „виртуелно исклучен“ по трансплантацијата, а во таква ситуација, обичната настинка може да биде фатална.
„Нема многу органи и нема да ги дистрибуираме на оние чии шанси за преживување се мали кога во исто време ги имаме оние кои се вакцинирани и имаат многу поголеми шанси за закрепнување по трансплантацијата“, рече Каплан.
Што вели семејството на Фергусон?
Диџеј Фергусон има две деца и бремена сопруга. Неговото семејство вели дека тој е премногу слаб за да се префрли во друга болница, додавајќи дека „има се помалку време“.
“Мојот син се бори храбро. Има принципи во кои цврсто верува и затоа уште повеќе го почитувам”, рекол неговиот татко Дејвид Фергусон и додал: “Тоа е негово тело и негов избор”.
Извор: Индекс.хр
Фото: Screenshot: CBS