Почнува изградба на основно училиште во Визбегово во општина Бутел, на вкупна површина од 12 029 квадратни метри и со капацитет за над 500 ученици, соопшти Министерството за образование и наука.
Склучениот договор за изведување на градежните работи за изградба на објектот, информира МОН, е во износ од 106.590.812 денари со ДДВ, а реализацијата е планирано да заврши за 18 месеци.
– Со изградбата на овој модерен училишен објект, во чиј состав е предвиден и простор за рекреација и спортување, се одговара на долгогодишните потреби и барања на жителите од населбата Визбегово. Со изградбата на новото училиште ќе се надополнат и потребите за економски развој на овој дел од градот, наведува МОН.
Министерството во соопштението посочува дека забрзано инвестира во осовременување на образовниот систем и квалитетно образование достапно за секое дете. Покрај во нови објекти, реконструкција и санација на постојните, за што во 2021 година се обезбедени една милијарда денари, МОН во изминатиот период вложи во нови наставни програми, опрема, нагледни и дидактички средства и 260 нови кабинети по природни наука.
– Со овие инвестиции правиме трансформација на националниот образовен систем преку кој го поттикнуваме полниот потенцијал на секој ученик и ученичка. Дополнително вложуваме и во унапредување на наставниот кадар, кој е клучот за квалитетно образование, за што е обезбедена континуирана обука и поддршка, информира Министерството за образование и наука.