Почнува првиот уписен рок на Универзитетот „Гоце Делчев“. Новите студенти ќе може да бираат меѓу сто студиски програми, а новитет годинава се стипендиите за најдобрите бруцоши.
Од денеска па до трети септември ќе бидат отворени вратите на Универзитетот „Гоце Делчев“ за запишување нови студенти. Универзитетот кој брои 12 факултети и три академии, нуди повеќе од 100 студиски програми, а од раководството информираат дека конкурсот е отворен за пет илјади студенти.
Проректорот за настава на Универзитетот, Кирил Барбареев информира дека наставата во новата студиска година ќе почне на 1 октомври.
Има повеќе причини за запишување на Универзитетот „Гоце Делчев“. Првата е достапноста и близината за студирање. Универзитетот е релативно млада институција, десет години е многу малку за еден универзитет да си го најде своето место под сонцето, но сепак станува збор за динамична институција, којашто покрај редовните активности кои ги нудат другите универзитети, не само во 
Македонија, туку и во регионот, обезбедува многу други содржини што се важни за еден млад човек во текот на студиите. Тоа кажува дека Универзитетот има добро развиен спортско-културен центар каде се реализираат многу содржини за студентите. Универзитетот има и своја радиотелевизија. За многумина, уште од основањето беше чудно зошто е потребно, така што има сериозни причини зошто некој би требало да се запише на овој Универзитет. Исто така важно е секој сам да процени зошто би го избрал овој Универзитет – објаснува Барбареев.
Годинава исто така, УГД за првпат ќе ги стипендира најдобрите бруцоши, а се очекува на овој начин да се мотивираат околу 150 идни студенти. Вториот уписен рок на Штипскиот универзитет кој има наставни центри уште во осум градови ширум земјава, ќе започне на 14 и ќе трае до 17 септември, а третиот започнува на 25 септември.