На граничниот премин Морина на албанско – косовската граница, уапсен е македонски државјанин откако кај него се пронајдени непријавени 39 илјади евра и опрема за производство на криптовалути.
– Службите на граничната полиција и царината на преминот Морина, како резултат на засилените контроли, со цел спречување и сузбивање на незаконитоста, врз основа на анализа на ризик, при влез во Република Албанија, на втората линија, извршија детална контрола на возило управувано од Б.Б.(33) државјанин на Северна Македонија. При контролата, откриени се и запленети 39.000 евра кои лицето претходно не ги пријавило, како и уред за кој постои сомневање дека се користи за производство на криптовалути, соопшти албанската полиција.
На крајот од првите дејствија извршени од страна на специјалците од секторот за истрага на економски и финансиски криминал од полицискиот комесаријат во Кукс, против Б.Б. поднесена е кривична пријава за „непријавување финансиски средства и вредни предмети“.
Доказниот материјал е доставен до Обвинителството за судската област Кукс за понатамошно постапување.
МИА