Од денеска во Свети Николе започнува со работа мобилната гинеколошка амбуланта, во која се вршат прегледи за рано откривање на ракот на грлото на матката.
Целта на работата на амбулантата е да се зголеми бројот на жени и девојчиња од 15
до 61 година кои ќе направат бесплатен ПАП тест, да се зголеми инклузивноста на жените
и девојчињата од ранливите групи и кои живеат во рурални и оддалечени места и да се
подигне свеста за важноста од редовни контроли.
Со мобилните здравствени услуги и превентивните прегледи ќе се намали
инциденцата и смртноста од рак на грлото на матката. Во мобилната гинеколошка амбуланта се достапни и совети за родово базираното насилство и за планирање на семејството.
Мобилната гинеколошка амбуланта е отворена секој работен ден од 9 до 14:30
часот.
Прегледите ги вршат гинеколози од Универзитетската клиника за гинекологија и
акушерство во Скопје и од повеќе болници во државата.
Работата на мобилните гинеколошки амбуланти, коишто во наредниот период ќе
бидат стационирани и во други општини низ државата, е овозможена со поддршка на
Министерството за здравство, Македонското лекарско друштво, Црвениот крст и УНФПА –
Фондот за население на Обединетите нации кои се носители на проектот и ја обезбедија
целокупната медицинска опрема неопходна за функционирање на амбулантите.
Прегледите се бесплатни, а пријавувањето ќе се одвива преку матичните доктори.
За преглед во мобилната гинеколошка амбуланта, жените и девојките можат да се пријават и на телефонските броеви: 077/653-637; 078/443-994; 074/600-171; 032/443-171.