Мајка го предала детето на таткото, со кој била разделена, без да го запознае дека детето е заразено со короно вирус и дека е издадено решение за изолација. Таткото  дознал, откако на Вибер апликацијата му стигнало решението од Државниот здравствен и санитарен инспекторат.

Токму поради тоа ОЈО Скопје до надлежниот суд поднесе Предлог за издавање казнен налог против едно лице кое сторило кривично дело – Непостапување според здравствените прописи за време на епидемија од член 206 став 1 од Кривичниот законик.

„Обвинетата, како законски застапник на дете родено 2019 година, не постапила според прописите и наредбите со кои се определуваат мерки за спречување на ширењето на коронавирусот. Имено, иако со решение на Државниот здравствен и санитарен инспекторат детето било ставено под здравствен надзор и домашна изолација во траење од 14 дена од 11.08.2021 година, обвинетата без да го запознае таткото на детето за настанатата ситуација, од 19-22.08 му ја дала ќерката за тој да оствари видување на кое имал право со решение на Центарот за социјални работи,“ се вели во соопштението од ОЈО.

Таткото се сретнал со детето надвор од неговиот дом, а за одредената задолжителна изолација на ќерката дознал кога на неговиот телефонски број, преку апликацијата Вибер му пристигнало решението на Државниот здравствен и санитарен инспекторат.

Надлежниот јавен обвинител му предложи на Основниот кривичен суд Скопје за обвинетата да одреди парична казна од 100 дневни глоби со поединечна вредност на дневната глоба од 20 евра во денарска противвредност.​​