Русија пријави неколку поединечни инфекции со нова варијанта на ковид-19, назначена AY.4.2 за која се верува дека е позаразна од видовите на делта-сојот, објави РИА Новости, повикувајќи се на изјава на руски научник.
„Можно е варијантата AY.4.2 да се шири побрзо“, рече Камил Хафизов, шефот на научната група за развој на нови методи за дијагностицирање на човечки болести на Централниот научно -истражувачки институт на Федералната служба за заштита на потрошувачите и здравјето на луѓето (Роспотребнадзор).
„Варијантата AY.4.2 сој „делта“ веќе е откриена во Русија во изолирани случаи, покажаа резултатите од секвенционирањето на геномот на коронавирусот SARS-CoV-2 зачуван во базата на податоци „VGARus“. Во некои кругови, новата варијанта се вика „делта плус“, но тоа име порано се однесуваше на друг вид и затоа сега постои одредена конфузија “, објасни тој и предупреди на „прилично голема веројатност“ дека новата мутација AY.4.2 ќе се прошири и во Русија и во светот.
Тој не ја отфрли можноста овој подтип на делта вирус да предизвика дополнително зголемување на ширењето на инфекцијата и нагласи дека само вакцинацијата може да помогне во борбата против таа варијанта, особено за оние кои сѐ уште не се заразени со ковид -19.
Според британските научници, новата мутација на коронавирусот AY.4.2 може да биде 10 до 15 проценти повеќе заразна од видовите на делта.
„Ројтерс“ забележува дека варијантата AY 4.2 е веќе откриена во Велика Британија и неколку други европски земји, а Израел во средата објави дека го открил првиот случај на нејзина територија.
Извор: espreso.co.rs