Најмалку 14 обожаватели биле повредени и префрлени во болници, откако реквизитите на влезот на туристички комплекс во кој концерт требаше да одржи групата „Бекстрит бојс“, се урнаа и повредија гледачи.
Инцидентот се случи во американската држава Оклахома. Концертот требаше да се одржи во комплексот „Вин Стар“, но почнала голема бура. Организаторите почнале да ги евакуираат гледачите.
Силниот ветар, сепак, ги турнал реквизитите на влезот на комплексот и целата конструкција паднала врз гледачите, соопштуваат американските медиуми.
Областа потоа била погодена од пороен дожд и од ветрови, кои дувале до 130 километри на час. Силното невреме ја урнало металната конструкција, што се наоѓала на влезот.
За концертот на познатата група биле продадени околу 12.000 билети. Концертот потоа бил целосно откажан.