Талибанците денеска во заседа во северниот дел на Авганистан киднапирале повеќе од 100 луѓе, вклучувајќи деца и жени, информираат официјални лица од таа земја.
Киднапирањето се случило и покрај повикот на претседателот на Авганистан Ашраф Гани за примирје за време на муслиманскиот празник Еид ал- Ада.
Шефот на регионалната влада во провинцијата Кундуз, Мухаменд Јусуф Ајуби изјави дека бунтовниците запреле три автобуси во регионот Кан Абад и ги киднапирале патниците.
Ајуби наведе оти верува дека талибанците барале вработени во владата и припадници на безбедносните структури.
Шефот на соседната провинција Тахар, Абдул Рахман Акташ рече дека луѓето во автобусите биле од провинцијата Тахар и Бадахшан, кои патувале во Кабул.
Талибанците не го коментираа инцидентот, но подрачјето во кое се случило киднапирањето е под нивна контрола.