По повеќе од четири децении Одделението за патологија во штипската Клиничка болница, денеска доби нов, современ микро том, кој значително ќе помогне при цитолошките и хистолошки анализи на малигните заболувања.
Директорот на Клиничката Болница, Ален Георгијев, вели дека потребата за нов апарат се јавила поради растот на оперативните и дијагностички процедури на Клиниката. Тој најави и набавка на уште еден апарат за овој оддел, со што ќе се заокружи модернизацијата на Патологија.
Како што информираше началникот на одделот за Патологија, Слободан Рогач, новиот инструмент е единствен во источниот регион.
– Од 1976 не сме добиле нова апаратура овде на Патологија. Ова е многу значајно за нас бидејќи работата постојано ни се зголемува, а целиот источен регион доаѓа за патолошки анализи овде. Со овој инструмент се процесуира ткиво на дебелина од 0,4 милиметри, за да биде погодно за микроскопирање, рече Рогач и потенцира дека во последно време се зголемува процентот на луѓе со малигни болести, а во источниот регион овој број е зголемен за околу 10 отсто.
Новиот апарат чини околу 14.000 евра, а е купен со средства од буџетот на болницата.