Исфрлање на градежен шут од малтер, цигли, камења на локации кои не се депонии, се почесто се случува на подрачјето на општина Дојран, посебно во пролетниот и летниот период кога во ек се реновирања и градежни работи.
Ваквите случаи се чести и на приватни имоти, односно на ниви со сопственик, каде несовесни граѓани си го истресуваат отпадот, и си поминуваат неказнето. Неодамна за ваков случај јавно во една од групите на социјалните мрежи посветена на случувања во Дојран, се пожали и жител на оваа општина, а на написот и фотографиите со кои се докажува прекршокот, следеа лавина написи од други жители за слични ситуации. Според дојранци, на места каде е поретка фреквенцијата на посетители, се создаваат мини депонии од секаков шут почнувајќи од парчиња мебел, душеци, плочки, цигли, па се до прозорци и врати. Најчесто тоа се точките на излезот и влезот во општината, а поголема депонија според тврдењата на жителите постојано се прави и во месноста Сретеново.
Градоначалникот Анго Ангов вели дека општината е запознаена со ваквите случувања, но за реакција од нивна страна биле потребни брзи пријавувања од граѓаните заедно со фотографии од локацијата.
– Ние работиме на терен, меѓутоа не можеме секогаш да знаеме каде се прават тие депонии. Имаме разговарано со луѓето кои поседуваат трактори, кои го исфрлаат тој шут, укажано им е дека тоа е казниво со закон, меѓутоа досега на лице место немаме фатено никој , освен еден. Апелираме до граѓаните штом знаат за ваков случај на лице место да го документираат и да го пријават. Казните се движат од 100 до 500 евра – појасни градоначалникот.
Според Ангов општината веќе расчистувала вакви депонии на своја сметка, а во моментот проблем бил и бројот на луѓе што можат да интервенираат бидејќи во текот на летната сезона комуналните работници претежно се ангажирани за средување на централното подрачје.
Роза Шулева