Неделниот извештај на Институтот за јавно здравје за минатата недела (од 26 април до втори мај, 2021год) покажува дека за присуство на коронавирус се тестирани вкупно 14.975 материјали, за 17,6% помалку од минатата недела, а регистрирани се 2.076 нови случаи во 34 градови во државава, што всушност претставува намалување од 39,7% во однос на минатата недела.
Најголем дел од регистрираните случаи се од Скопје, а највисока неделна инциденца е регистрирана во Виница.
Од новозаразените, најзастапени се лицата на возраст над 60 години со околу 37,6%, по нив следуваат лицата од 50 до 5 години со 16,8%, од 40 до 49 години со 16%, од 30 до 39 години со 15,6% и лицата меѓу 20 и 29 години со 8,3%. Најмал број е регистриран кај децата од 0-9, 1,6% и 10-19 години 4,1%.
По добиени 2 негативни теста за присуство на SARS-CoV-2 или со употреба на новиот алгоритам, со статус „оздравени” се стекнале 4.012 лица кои биле хоспитализирани или на домашно лекување, со намалување од 34,5% во споредба со минатата недела.
Пријавени се 167 смртни случаи од 22 градови, 20,9% помалку во однос на минатата недела. Во однос на возраста, 150 лицa биле над 60 години, 15 лица на возраст од 50-59 години и по едно лице од возрасните групи од 30-39 и 40-49 години.
На 17.02.2021 во Р. С. Македонија започна вакцинацијата против КОВИД19. Од 05.04.2021 се започна масовна вакцинација во вакцинален пункт во салата „Борис Трајковски”, каде што покрај вакцинирани здравствени работници беа вакцинирани и лица од критичната популација.
Заклучно со 02.05.2021, со Pfizer/Biontech вакцинирани се вкупно 19.858 (15.933 со прва доза и 3.925 со втора доза), со Sputnik V се вакцинирани 34.177 (22.768 со прва доза и 11.409 со втора доза), со вакцината на AstraZeneca вкупно се вакцинирани 21.949 лица и со Sinopharm се вакцинирани 953 лица.